ஆர்த்த பிறவி

பொம்மைகளுக்கு ஏது தனி வாழ்வு?

ஆட்டுவிப்பவன் இருக்கும் வரையில்

அனு தினமும் ஆடும் பொம்மைகள்.

கயிறு அறுபட்ட பொம்மைகள்

தனித்து வீதி அடையும்.

நாளின் பிற்பகுதியினில்

களிமண்ணில் இருந்து உயிர் பெறும்.

கலைகின்றன பொம்மைகளின் வேஷங்கள்;

கலைகின்றன பொம்மைகளின் கனவுகள்.

நிஜம் தேடும் நித்திய வாழ்வு;

தேடல் தொடங்கும்;

தேடல் முற்றுப் பெறும்

மீண்டும்

தேடல் தொடங்கும்;

தேடல் முற்றுப் பெறும்

பிறிதொரு நாளில்

அனைத்திற்கும் பிறகும்

நிலைபெற்றிருக்கும் பிரணவாகார ஒலி.

மௌன நாதத்தில் ஒடுங்கும் மனமும்.

புகைப்படம் :  Karthik Pasupathi

*ஆர்த்த பிறவி துயர் கெட - திருவாசகம்